​БІРЛІК ПЕН КЕЛІСІМ ЖОЛЫНДАҒЫ 30 ЖЫЛ

Мерейтойлық жыл аясында Шымкентте қалалық ассамблеяның ұйытқы болуымен 334 мәдени-көпшілік іс-шара ұйымдастырылды. Қалалық ассамблея жанындағы Этномедиация кеңесінің бастамасымен «Құқық қорғау және татуласу орталығы», Достық үйінен комьюнити орталығы ашылды. Этномұражай жаңғыртудан өтті.

Астана қаласында Қазақстан халқы Ассамблеясының 30 жылдығын қорытындылауға арналған «Бірлік пен келісім жолындағы 30 жыл» тақырыбында Қазақстан халқы Ассамблеясының форумы өтті. ҚХА Төрағасының орынбасары, Қазақстан Республикасы Президенті Әкімшілігі ҚХА хатшылығының меңгеруші Марат Әзілхановтың жетекшілігімен өткен телекөпірде жыл ішінде атқарылған ауқымды жұмыстар мен іске асқан жобалар сараланып, алдағы межелі мақсат-міндеттер айқындалды. Қазақстан Республикасы Президенті жанындағы «Орталық коммуникациялар қызметінде» ұйымдастырылған телекөпірге барлық өңірлер қосылды. Елдің ішкі бірлігін бекемдеу, этносаралық татулықты тұғырынан түсірмеу жолындағы кешенді жобалар мен іске асқан мазмұнды іс-шаралар талқыланған қорытынды форумда ҚХА құрылымдарының жетекшілері сөз сөйледі. Ал атаулы жылы өңірлерде ассамблея жобалары, ассамблея жастары, қайырымдылық, этномедиация сынды түрлі бағыттар бойынша атқарылған жұмыстар баяндалды. Телекөпірге қалалық ішкі саясат басқармасының басшылығы, қалалық этномәдени бірлестіктердің төрағалары, «Ассамблея жастары» ұйымының белсенділері мен «Қоғамдық келісім» мекемесінің жауапты қызметкерлері қатысты. Айта кетейік, мерейтойлық жыл аясында Шымкентте қалалық ассамблеяның ұйытқы болуымен 334 мәдени-көпшілік іс-шара ұйымдастырылды. Қалалық ассамблея жанындағы Этномедиация кеңесінің бастамасымен «Құқық қорғау және татуласу орталығы», Достық үйінен комьюнити орталығы ашылды. Этномұражай жаңғыртудан өтті. Қайырымдылық бағытта әлеуметтік тұрғыда аз қамтылған 1400 отбасыға көмек ұсынылды. Түрлі форматта өткізілген іс-шаралар мен жобалар жайлы БАҚ пен әлеуметтік желіде 4 мыңнан астам материал жарияланды. Межеленген жоспарлы жұмысты атқаруға қала әкімдігінің, салалық басқармалар мен аудан әкімдіктерінің, «Қоғамдық келісім» мекемесі мен қалалық этномәдени бірлестіктердің, қалалық ҚХА жанындағы қоғамдық құрылымдардың, жоғары оқу орындары мен колледждердің және БАҚ-тың әлеуеті жұмылдырылды.

Жиын барысында Қазақстан халқы Ассамблеясының құрылған сәттен бастап еліміздегі тұрақтылық пен бейбітшілікті сақтаудағы рөлі айрықша екені тағы бір мәрте дәлелденді. Шымкент қаласы көпұлтты аймақ ретінде осы бағыттағы маңызды бастамалардың орталығына айналып отыр. Үшінші мегаполисте түрлі этностардың өкілдері бір шаңырақ астында тату-тәтті өмір сүріп, қаланың әлеуметтік-экономикалық және мәдени дамуына өзіндік үлестерін қосуда. Жаңартылған Этномұражай мен Достық үйі жанынан ашылған жаңа комьюнити орталығы қала тұрғындары мен жастардың басын қосатын, ұлттық құндылықтарды дәріптейтін және мәдениеттер тоғысатын негізгі зиялылық алаңға айналды. Мұндай нысандардың жұмысы өскелең ұрпақты отансүйгіштікке тәрбиелеуде және ұлтаралық достықты нығайтуда маңызды рөл атқарады.

Сонымен қатар, қазіргі таңда этномедиация институтын дамытуға ерекше көңіл бөлінуде. «Құқық қорғау және татуласу орталығының» ашылуы қоғамдағы кез келген түсініспеушіліктер мен дау-дамайларды сотқа жеткізбей, өзара келісім мен бейбіт сұхбат арқылы шешудің тиімді тетігін қалыптастырды. Қалалық ассамблея жанындағы ақсақалдар кеңесі мен аналар кеңесі де бұл үдеріске белсенді араласып, отбасылық құндылықтарды сақтау және ұрпақтар сабақтастығын қамтамасыз ету бағытында жүйелі жұмыстар жүргізіп келеді. Осындай кешенді құрылымдардың үйлесімді қызметі кез келген әлеуметтік және этносаралық сипаттағы тәуекелдердің алдын алуға мүмкіндік береді.

Қайырымдылық шаралары да Ассамблея жұмысының ажырамас бөлігіне айналды. Жыл бойы мұқтаж жандарға көрсетілген көмектер мен «Жүректен жүрекке» акциялары қоғамдағы ынтымақтастық пен өзара қолдау рухын асқақтата түсті. Саяси, мәдени және әлеуметтік бағыттарды қамтыған бұл ауқымды еңбек алдағы уақытта да жалғасын таппақ. Мерейтойлық жылды қорытындылаған форум қатысушылары еліміздің басты байлығы — бірлік пен бейбітшілік екенін атап өтіп, мемлекеттің тұрақты дамуы мен жарқын болашағы жолында бірлесе еңбек етуге дайын екендіктерін жеткізді. Мемлекеттік деңгейдегі бұл стратегиялық бағыт Шымкент қаласының қоғамдық келісімді сақтаудағы жаңа жетістіктеріне берік негіз болмақ.