Шымкент қаласында жаяу жүргіншілердің жолдағы қауіпсіздігін қамтамасыз ету мақсатында профилактикалық шара өткізілді
130
Шымкент қалалық Патрульдік полиция полкі мен «Жастар ресурстық орталығы» бірлесіп, «Жаяу жүргінші» жедел-профилактикалық іс-шарасы аясында қала тұрғындарына бағытталған кешенді түсіндіру жұмыстарын жүргізді.
Іс-шара барысында патрульдік полиция қызметкерлері мен жастар ұйымының өкілдері жол қозғалысына қатысушыларға жаяу жүргіншілердің жолдағы қауіпсіздігін сақтау бойынша түсіндірме жұмыстарын жүргізіп, арнайы ақпараттық жадынамалар таратты.
Аталған жадынамаларда жаяу жүргіншілердің қозғалыс ережелері, белгіленбеген жерден өтудің қаупі, сондай-ақ жүргізушілердің жаяу жүргіншілерге жол беру міндеттері қамтылған. Шараның басты мақсаты – тұрғындардың құқықтық сауаттылығын арттырып, жол-көлік оқиғаларының алдын алу.
Патрульдік полиция полк командирінің міндетін уақытша атқарушы, полиция подполковнигі Аширбаев Тоқтарбек сөз сөйлеп, жол қозғалысына қатысушыларды тәртіп пен қауіпсіздік ережелерін қатаң сақтауға шақырды.
– Жол қозғалысы ережелерін сақтау – әрбір азаматтың азаматтық борышы. Біздің негізгі мақсатымыз – жол-көлік оқиғаларының алдын алу арқылы адам өмірі мен денсаулығын сақтау. Мұндай түсіндіру шаралары алдағы уақытта да жалғасын табады, – деді Аширбаев Тоқтарбек.
Айта кету керек, полиция мен қоғамның өзара іс-қимылы – жолдағы қауіпсіздікті қамтамасыз етудің негізгі тетіктерінің бірі.
Сонымен қатар акция барысында мектептер маңы мен базарлар жанындағы «қауіпті нүктелерде» нысаналы түсіндіру жүргізіліп, 700-ден астам жадынама мен 120 жарыққайтарғыш (фликер) таратылды. Алдағы екі аптада 25 жаяу өткелдің сызығы жаңартылып, 8 учаскеге жасанды кедергі, 10 қиылыста «ақылды» бағдаршам орнатылады. Азаматтар бұзушылықты «102» және iShymkent арқылы фото/видео жолдай алады. Полицияның алдын ала дерегі: соңғы айда жаяу жүргінші қатысқан ЖКО 12%-ға азайды.
