«AMANAT» ПАРТИЯСЫ: «ҚАРЫЗСЫЗ ҚОҒАМ» ЖОБАСЫ АЯСЫНДА АУҚЫМДЫ ЖИЫН ӨТТІ

Шымкент қаласында «AMANAT» партиясының «Қарызсыз қоғам» жобасы бойынша маңызды жиын ұйымдастырылды. Басқосуға «AMANAT» партиясы Шымкент қалалық филиалы атқарушы хатшысының орынбасары Ербол Байқонысов төрағалық етті. Жиынға Қаржы басқармасы басшысының орынбасары Әлия Мейірова, жобаның қаржы эксперті Ақбота Тұрарова, Мемлекеттік кірістер департаментінің дәрменсіз борышкерлермен жұмыс басқармасының басшысы Нұржан Сергазин, Қаржы нарығын реттеу және дамыту агенттігінің өңірлік өкілдер басқармасының Шымкент қаласы бойынша басшысы Ануар Шотаев, сондай-ақ аудан әкімінің жауапты орынбасарлары мен қызметкерлері қатысты.

Жиында «Қарызсыз қоғам» жобасының қала аумағында жүзеге асырылуы және алдағы міндеттері талқыланды. Ербол Байқонысов өз сөзінде аталған жобаның қоғам үшін өзекті екенін атап өтті.

«AMANAT»-та халық арасында кең қолдау тапқан партиялық бастамалардың бірі – осы «Қарызсыз қоғам» жобасы. Мемлекет басшысы Қасым-Жомарт Тоқаев Жолдауында азаматтардың қаржылық сауатын арттырудың маңызын атап өтіп, Үкіметпен бірлесіп жобаның ауқымын кеңейтуді тапсырған болатын. Осы тапсырма аясында арнайы Жол картасы бекітіліп, жемісті жұмыс жүргізіліп келеді. Былтыр қала бойынша 11 000 адамды оқыту жоспарланғанымен, бұл көрсеткіш 12 593 адамға жетіп, жоспар артығымен орындалды. Биыл 22 200 адамды қамту көзделсе, бүгінгі күнге дейін 19 200 тұрғын қаржылық сауаттылық курстарынан өтті», – деді ол.

Жобаның іске асырылу барысы туралы кеңірек баяндаған қаржы эксперті Ақбота Тұрарова жыл бойы атқарылған жұмыстарға тоқталды.

«Биыл 22 200 адамды оқыту жоспарланды. Сонымен қатар, несиесін 90 күннен аса кешіктірген азаматтарға тегін заңгерлік көмек көрсетілуде. Сабақтар онлайн және офлайн форматтарда өткізіліп, түрлі мекемелерде ұйымдастырылды», – деді ол.

Жиын соңында Ербол Байқонысов Мемлекет басшысының тапсырмаларының орындалуы қатаң бақылауда екенін атап, жыл соңына дейін бекітілген жоспарды толық орындау қажет екенін міндеттеді.

Бұл жиын қаржылық мәдениетті арттыруға, азаматтардың қарыз жүктемесін азайтуға бағытталған жұмыстардың жүйелі жүргізіліп жатқанын көрсетті.

Жиын барысында банк өкілдері мен қаржы ұйымдарының қатысуымен азаматтардың кредиттік тарихын жақсарту тетіктері де талқыланды. Атап айтқанда, қайта құрылымдау, төлем мерзімін ұзарту және айыппұлдық өсімпұлдарды азайту мүмкіндіктері түсіндірілді. Сонымен қатар, қиын жағдайға тап болған азаматтарға арналған арнайы қолдау бағдарламалары туралы ақпарат беріліп, әрбір жағдай жеке тәртіппен қаралатыны айтылды.

Қаржы нарығын реттеу және дамыту агенттігінің өкілдері азаматтардың құқықтарын қорғау және қаржы ұйымдарының жауапкершілігін арттыру бағытында қабылданып жатқан шараларға тоқталды. Олардың айтуынша, соңғы жылдары онлайн несиелеу саласында бақылау күшейтіліп, алаяқтық тәуекелдерін азайтуға бағытталған бірқатар жаңа талаптар енгізілген. Бұл өз кезегінде азаматтардың қаржылық қауіпсіздігін қамтамасыз етуге ықпал етеді.

Сонымен қатар, Мемлекеттік кірістер департаментінің өкілдері борышкерлермен жұмыс жүргізу тәртібі туралы түсіндіріп, салықтық берешекті реттеу және оңтайландыру тетіктері жөнінде ақпарат берді. Азаматтарға берешекті кезең-кезеңімен өтеу, ресми келісімдер жасау және соттан тыс реттеу жолдары ұсынылды. Бұл шаралар қарыз жүктемесін азайтуға және әлеуметтік тұрақтылықты сақтауға бағытталғаны айтылды.

Жиын қорытындысында қатысушылар «Қарызсыз қоғам» жобасының маңыздылығын ерекше атап өтіп, оның нәтижелі жүзеге асуы үшін барлық мемлекеттік органдар мен қоғамдық ұйымдардың бірлескен жұмысы қажет екенін жеткізді. Алдағы уақытта жобаның аясын кеңейту, қамтылатын азаматтар санын арттыру және қаржылық сауаттылықты жүйелі түрде көтеру бағытында нақты шаралар қабылданатыны айтылды.