Бүгін «AMANAT» партиясы Шымкент қалалық филиалы жанындағы Экологиялық кеңес пен Сыбайлас жемқорлыққа қарсы іс-қимыл жөніндегі кеңестің бірлескен отырысы өтті.

Жиынға партия филиалы Атқарушы хатшысының орынбасарлары Ербол Байқонысов пен Талғат Балтабаев, мәслихат депутаттары, кеңес мүшелері және қалалық басқарма басшылары қатысты.

Күн тәртібінде екі маңызды мәселе қаралды:

Мемлекет басшысы Қасым-Жомарт Тоқаевтың Жолдауында айқындалған басым бағыттардың жүзеге асырылу барысы;

Партияның «Халықпен бірге!» атты сайлауалды бағдарламасы аясындағы «Жайлы орта» бағыты бойынша Шымкент қаласында атқарылып жатқан жұмыстар және қоғамдық қабылдауға түскен азаматтық өтініштерді талқылау.

Шымкент қаласының қалалық жайлы ортаны дамыту басқармасы 2025 жылы сыбайлас жемқорлықтың алдын алу және құқық бұзушылықтардың профилактикасы бағытында жүйелі жұмыстар атқаруда.

Басқарма басшысының айтуынша, 2025 жылы сыбайлас жемқорлықтың алдын алу бағытында бірқатар жұмыстар атқарылуда.

Ішкі талдау жүргізіліп, бұзушылықтарды жою жоспары бекітілді;

Әдеп кодексін сақтау және адалдық қағидаттарын нығайту бойынша семинарлар өткізілуде;

Қызмет барысында ашықтық пен есептілік қамтамасыз етілген;

Мемлекеттік қызметтің 9 түрі толық автоматтандырылған.

Сонымен қатар, Шымкент қаласында экологиялық инфрақұрылымды дамыту бағытында ауқымды жұмыстар атқарылуда.

«Қошқар ата» өзенінің бойы толық абаттандырылып, қалған бөлігі жыл соңына дейін аяқталады;

Дендросаябақ аумағының 80%-ына автоматтандырылған суару жүйесі орнатылды;

230 мың түп ағаш отырғызылып, 1 млн жасыл желек цифрландырылды;

3100 жаңа қоқыс контейнерін орнату және қалдықтарды сұрыптау зауытының құрылысы жоспарланған;

Бадам өзенінің 9 шақырымдық жағалауы бекітілді.

Кеңес барысында қаланың экологиялық жағдайын жақсарту, инфрақұрылым сапасын арттыру және мемлекеттік қызметтің ашықтығын қамтамасыз ету мәселелері кеңінен талқыланды.

Кездесуді қорытындылаған кеңес төрағалары Жеңісбек Тұрғанов пен Берген Ержаппар алдағы уақытта да бірлескен жұмысты жүйелі түрде жалғастырудың маңыздылығын атап өтті.